Edvard Nalbandyan: «Biz təklif edirik ki, qabaqcadan heç bir şərt qoymadan münasibətlər qurulsun»
Ermənistanın xarici işlər naziri Edvard Nalbandyan Türkiyə ilə əlaqələri heç bir şərt olmadan normallaşdırmağa hazır olduqlarını bildirib. Ermənistan Xarici İşlər Nazirliyi mətbuat xidmətinin məlumatına görə, erməni nazir bunu fransalı həmkarı Bernar Kuşnerlə görüşdən sonra bildirib.
Edvard Nalbandyanın sözlərinə görə, Ermənistan və Türkiyə xalqlarının hazırkı nəslinə keçmişdən ağır miras qalıb və tarixin bu qara səhifəsini çevirmək üçün siyasi rəhbərlər tam məsuliyyətlə bir-birinə yardım etməlidir: «Öz tərəfindən Ermənistan buna hazırdır. Biz təklif edirik ki, qabaqcadan heç bir şərt qoymadan münasibətlər qurulsun. Bundan bütövlükdə region və hər iki xalq uda bilər».